ភ្នំពេញ៖ ព្រះមហាក្សត្រនៃព្រះរាជាណាចក្រកម្ពុជា សម្ដេចព្រះបរមនាថ នរោត្តម សីហមុនី ទ្រង់យាងប្រទានភ្លើងជ័យនៅព្រឹក ថ្ងៃព្រហស្បតិ៍ ទី៩ ខែវិច្ឆិកា ឆ្នាំ២០២៣ នេះនៅវិមានឯករាជ្យ ក្នុងរាជធានីភ្នំពេញ។
ការដុតទៀនជ័យនេះ គឺដើម្បីអបអរសាទរទៅដល់ទិវាឯករាជ្យ ៧០ឆ្នាំបន្ទាប់ពីកម្ពុជាទទួលបានឯករាជ្យពីប្រទេសបារាំងក្នុង ឆ្នាំ១៩៥៣។
គួរឲ្យដឹងដែរថា ប្រទេសបារាំងបានដាក់អាណានិគមន៍លើកម្ពុជាអស់រយៈពេលជិតមួយសតវត្សរ៍ (១១ សីហា ១៨៦៣-៩ វិច្ឆិកា ១៩៥៣)។ ឯករាជ្យជាតិរបស់កម្ពុជា ត្រូវបានទទួលមកវិញក្រោមស្នាព្រះហស្តរបស់អតីតព្រះមហាក្សត្រសម្ដេច ព្រះនរោត្តម សីហនុ នឹងបានប្រកាសនៅថ្ងៃទី៩ ខែវិច្ឆិកា ឆ្នាំ១៩៥៣។ ប្រជារាស្ត្រកម្ពុជាទូទាំងប្រទេស បានថ្វាយព្រះកិត្តិនាមព្រះអង្គជា «ព្រះមហាវីរបុរសជាតិ ព្រះបិតាឯករាជ្យជាតិ»។
ដើម្បីជាការចងចាំនូវព្រះរាជស្នាព្រះហស្តដ៏ឧត្តុងឧត្តម នៃការទាមទារឯករាជពីអាណានិគមបារាំងនេះ វិមានឯករាជ្យត្រូវបានកសាង និងសម្ពោធដាក់ឲ្យប្រើប្រាស់នៅឆ្នាំ១៩៥៨៕
